婚宴

有位舊同事結婚，今日去左飲佢果餐。雖然我仲未結婚，但係婚禮都去過同攪過唔少，不過從未見識過咁既婚禮。

新娘子係我既舊同事，今年只有 23 歲，上年已經註左冊，今年先至補擺喜酒。首先去到既感覺唔多似去左一個婚宴，似係落左 bar，因為一對新人既朋友都係廿來歲，嘻嘻哈哈劈哂酒咁玩，我地一眾老餅入到去都只係坐埋一角等開席。終於等大家打完牌準備開席，一對新人出場時既感覺好攪笑，似玩結婚遊戲多過似真係結婚，因為都唔覺得莊嚴，有少少兒戲，可能我地老餅啦，同 d 後生仔女有代溝都唔定。

到敬酒時仲似落左 bar，成班人起哄一大杯一大杯咁劈，爭在冇左個骰盅姐~ XD 新娘子玩得仲癲過佢老公，我同班同事旁觀時仲諗緊佢地屋企人會唔會唔多高興呢？可能我屋企比較愛面子啦，咩都要好好睇睇，絕對唔會出現呢 d 情況，所以有少少唔慣。席間例牌又有同事問幾時輪到我啦
擺酒，哈哈哈，我結婚都未必會擺酒啦，更何況我都過哂響往婚禮既階段。響我心目中結婚只係一種儀式，兩個人一齊生活開心先至係最緊要。妹妹下年都結婚了，我都開始諗諗係唔係應該去註個冊叫做了左屋企人既心願…