禮物黨

公司成日都會響報紙雜誌度登下 coupon 位，以一個好優惠既價錢比新客試做最新服務，當中仲有部份 coupon 係有禮物送的，只要客人黎試一次都有份小禮物送比佢。新客多數都會揀尖沙咀間分店試做，因為果度方便 d 丫嘛。平均每次出 coupon 都有十幾二十個客黎試，不過尖沙咀既同事既 closing rate 就認真低，只有四份一既客人會響度開 course，而且銀碼非常細，其餘既都拎左禮物就走人。尖沙咀既同事為左掩飾自己既不濟，就幫呢班客起左個朵，就係「禮物黨」。意謂呢班人黎既目的只係想要禮物，根本冇意欲開 course 云云。當然唔係每一個客人黎試都準備定錢開 course 啦，我地送禮物既目的就係要吸引佢地黎，只要有多 d 人黎，就會有多 d 機會開單嘛。不過佢地對新客採取抗拒既態度，又點會開到單？尖沙咀既同事仲攪笑，為左證明佢地係對的，就整左一份「黑名單」，仲比埋我店，要求我地唔好接呢 d 客。我就睬佢都多餘，只要有客 book，有理冇理接左至算。

星期六正好有一個好例子，有個客打電話黎 book 左一個試做，新客喎，梗接啦！撞岩果日有位尖沙咀既同事抽調過黎幫手，一認就認出果位客人響尖沙咀間店度試左其他優惠但係冇開 course，就同 Annie 講呢個客係「禮物黨」。既然客人已經黎到，我地都唔會趕人走既，都照做，不過做完之後 Annie 就同呢位「禮物黨」客人傾 course。結果係點？當然係做成左佢單生意啦！我店冇咩叻，最叻係用行動證明「凡事皆可能」。人地越係話做唔到咩？我地就即場做比你睇，等尖沙咀既同事冇說話好講。

咩叫「禮物黨」呀？客人唔肯開單，只係證明左你不濟，唔好下下都將責任推落個客度。淨係響呢個 blog 都唔知講左幾多次，客人係冇責任比錢你駛的，只有我地有責任令客人願意比錢姐。呢單野只係其中一單，之前都試過好幾次，尖沙咀既所謂「禮物黨」黎到我店，全部都開單的。佢地仲肯黎，即係佢地都鍾意我地既服務，如果唔係，有野送都唔黎啦。你估真係得閒成咁呀？