外表

昨晚同男友 Tiger 溫馨地睇電視，睇到一個節目，令我諗左 d 到而家都唔係好明既野。個節目係某整容公司既真人騷，昨晚既主角係一個 19 歲男仔為左想成為模特兒而去整容。一見到主角係男性，Tiger 即時好大反應︰「有冇攪錯呀？男人老狗整咩容呀？男人最緊要有內涵丫嘛！」我就同 Tiger 講︰「你靚仔丫嘛 (讀者們先不要嘔，情人間既說話係擺明包哂糖衣… XD)，又點會明丫。」Tiger 回敬左我一句︰「咁你明咩？」

諗諗下，我又真係唔明喎。

到而家我都唔明點解要整容，可能我心底係抗拒呢樣野，所以真係諗左好耐都唔明點解會有人有咁大既決心去整容。其實我覺得整容係好可怕的，要尋回自信，有好多方法，外表絕對唔係排第一。又可能我真係絕對冇需要去整容 (少女菲菲都幾標緻 ga，不過而家多左 d 歲月痕跡之嘛… XD)，所以無法子想像容貌不濟時有冇需要去整容。

不過都好既，起碼真係想改善自己容貌既人都叫做有方法丫，雖然個人覺得呢 d 方法不太可取。菲菲都係欣賞腳踏實地去努力既人，外表既野，可以靚得幾耐？靚又點？都係同意 Tiger 果句︰最緊要有內涵！