Draw 精

有上過成長課程既朋友，都知咩叫 draw 精。雖然我冇上過成長課程，不過都有人叫過我做 draw 精。呢句既意思大概係形容 d 人成日 draw 別人既 energy，係個負面地形容一個人。舉例︰成日向人訴苦、表達自己好可憐、覺得被人傷害、只識怪責別人不是等等，都會比 d 上過成長課程既人叫做 draw 精。響我既詮釋，係一個睇唔開又要人可憐既煩人。

自省左好幾次，都唔係太明點解果一位朋友會叫我做 draw 精。先講下我地點認識，我地係響一個教人突破生意成績既課程入面認識既，我係學員，佢叫做 Crystal，係我地班既教練，不過唔係我既直屬教練。呢個課程為期三個月，學員不但要不斷突破生意，仲要互相支持，亦一齊攪過活動，大家既感情都幾 close。我響班中都算幾受歡迎，好多學員都鍾意同我一齊。同組既學員推舉左我做組長，其他學員需要支持時我都會幫手。大家對我既評價都好高，我仲係 1st rank 畢業的。三個月好快過去，大家都不斷會攪好多活動出黎聚下。但係我唔係次次都出席，基本上係好少可會見到我，因為我收工太夜了，唔想自己咁奔波。

記得上一次我有出席既係一個 bbq 聚會，岩岩我放緊大假，所以可以全情投入去玩。因為我少出現既關係，自然就成為眾人既焦點，有位學員叫 Joseph 的仲叫我唔好咁早走，佢夜 d 會同埋朋友經皇崗返大陸，會順道車埋我返屋企。Crystal 都係住響元朗，知道有人會車我返屋企，就叫 Joseph車埋佢。不過不幸地，Joseph 仲要車其他人，加埋我岩岩好 5 個，載唔到 Crystal。呢個時候，佢就話我係 draw 精，係都要人車埋我返屋企，點解唔自己搭車喎。

唔係下化？好似係人地話要車我，我都冇提出過，關我咩事？我都想知點解佢唔自己搭車呢可？呵呵呵~ 不過菲菲唔係輕易響公眾場合得罪人的，有失斯文嘛，所以都冇出聲。到散水時，Joseph 叫我跟佢車，Crystal 仲快過我上左車，之後話冇位，攪到 Joseph 好尷尬。最後，Joseph 唯有夾硬超載左一小段路，車左我同 Crystal 去最近既火車站，Crystal 夾硬拉埋我同佢轉車，我就好無奈咁夜媽媽自己返屋企。

因為我地係搭埋同一架車既關係，佢一路上不斷問我而家做緊咩，搵緊幾多錢，有冇咁煩呀？於是我扮醉閉目養神唔鬼理佢。之後佢就打電話搵朋友傾計，仲同佢朋友講有個女仔好衰，攪到佢冇車坐。d 野調返轉黎講既？

有其他朋友都識佢，朋友戲言，佢唔抵得我咁受男學員歡迎，所以先至咁對我姐。真係可憐！大家都幾十歲人啦，仲吃埋哂 d 無謂乾醋，笑死人咩。受唔受歡迎既野，唔係你話既，係人地認為既姐，呢樣野我最有研究了，因為我好細個已經學習如何受異性歡迎，佢仲未開竅既，幫佢唔到。