我的第一個人生轉捩點

你有幾多次人生轉捩點呢？第一個又係幾時發生呢？我經歷過好幾次既人生轉捩點，每一次都改變左我，每一次都係寶貴的一課。我既第一個人生轉捩點，發生於小學五年班，當時我十歲。

小學一年級既開課日，小朋友應該係開開心心換上新校服，背上新書包，去一個新環境，認識新朋友，同埋面對迎挑戰。不幸地，我一年級既開課日缺席了，因為我發了三天既高燒，病到迷迷糊糊，第四天終於好轉，終於比別人遲左三日先至接觸新環境。

好記得我第一日返學唔係去課室，因為我都唔知編左去邊一班，所以媽媽同我去左校務處攪清楚手續之後，就比人帶左去一個班房。入到班房，所有人包括老師都用奇異眼光望我，年紀小小既我真係不知所措，老師知道我係呢一班既學生之後，就指我坐埋一二邊。坐好之後，我都唔知老師做緊乜，又唔知上緊咩堂，東張西望想搵個依靠，點知仲比老師鬧我坐唔定。

小息時，全部同學都離開課室，老師喝令我離開課室，我仲以為咁快放學，執埋書包離開左學校。當時我都唔知原來小學有放小息呢回事，又唔知小息要去操場玩，其實基本上都冇人同我玩。好記得當日自己離開學校之後竟然識去外婆家，當時媽媽響外婆家，見我拍門，嚇到佢地要死，即刻帶返我去學校，你話幾笑死人丫。本來呢 d 只係笑話，不過我仲未知道原來呢一日係我六年惡夢既序幕。

同學們見我第一日出現既行徑奇奇怪怪，大家都唔願意同我玩，我諗唔係好多人試過連續六年都比同學杯葛，我係其中一個。最初幾年我好唔開心，唔明白點解比人杯葛，只知道自己係全校最不受歡迎既人，老師同學個個都唔鍾意我。我既世界就只有自己。學校旅行我都係自己一個周圍行，冇人會叫我一齊食野或者一齊玩，老師都冇理我，我就有如一個不相干既人。當時既我好冇自信，行路 dup 低頭，個樣唔出聲都好似喊緊 (你話幾唔討人歡心丫)，唔鍾意講野，都有 d 自閉 feel。唔止同學唔鍾意我，連親戚都嫌棄我，有玩有食既活動一概冇我份。你話人生如我，幾咁冇趣哩。當時我只係一個小學生…

小學五年級，我已經響呢種環境生活左五年，呢五年真係好漫長，漫長到我以為我應該要結果。有一日放學後去左爺爺家既天台諗住跳落去，不過當時我太瘦小，唔夠高爬上去，所以死唔去。其實要去死真係需要好大既勇氣，當爬唔上去果一刻，尋死既勇氣即時冇左。隨之而黎既係，我問自己，點解我咁唔受歡迎？連天主都唔要我？ (小學係天主教學校，日日唸天主經，以為天主會要我 tim) 年紀小小已經識得怨天尤人，怨唔公平，怨自己命苦。不過怨下怨下，我就諗，點解人地會咁受歡迎既？於是我就不停思索學校內面受歡迎既同學有咩特質，諗下諗下，我好唔忿氣。我唔忿氣受歡迎果個點解唔係我，於是我死唔去既一刻就同自己講，我要人人都鍾意我！

以上全部係事實，我第一個立下既志向唔係做 d 咩，而係要做一個最受歡迎既人。從天台走下樓梯，我開始學笑，學挺直腰骨行路，學望住別人既眼睛，學所有受人歡迎既人要做既野。六年級畢業，我派唔返原校升中學，最初媽媽擔心我失望，其實我不知幾開心，終於離開折磨左我六年既煉獄，可以重新開始，重新做人。

中學既生活比小學開心好多，因為我可以用一個普通學生既身份結識新朋友，不再好似怪物咁生人勿近。雖然我既人際技巧都未係好叻，不過都叫做有班朋友仔，心情一年比一年開朗。終於我於五年級為自己許下的誓言，響我大學一年級開始實現了。讀大學時既我，絕對係萬千寵愛在一身，有新認識既朋友仲以為我係由細比人寵壞既溫室小女孩，有邊個相信我曾經係一個神憎鬼厭既人？我做到了，我成為最受歡迎的人了。

人生既第一個轉捩點，發生響我十歲，某一天放學既天台。呢一日雖然唔記得係幾月幾日，不過，我好多謝天主，因為我唔夠高死唔去，先至為我既人生上左第一堂寶貴的一課。人生既煉歷不斷出現，不過經過呢一役，我對自己充滿信心，因為我證明左比自己睇，我絕對可以改變命運，只要我意志夠堅定，冇人可以阻撓的。