衝突與平衡

響工作上，大家有機會遇到人事衝突，仲會認為如果公司冇左某某人士就天下太平云云。初出茅廬既菲菲都有咁既諗法，不過而家就好明白，適當既人事衝突係有助公司既平衡。

舉個例，我係一個 result-oriented 既人，主要既職場秘訣係獲得老細既信任同埋完成老細下達既指令。響我心目中，卒數、訓示同事同埋挑佢地既骨頭係我既主要工作，因為老細喜歡咁既下屬。而 Annie 係一個口硬心軟既人，主要既職場秘訣係獲得同事既擁戴。事實上都好明顯，同事們係好鍾意 Annie，不過就好怕我，因為我唔會企響同事既立場思考，我只會顧及老細既需求，所以響同事心目中，Annie 係天使，我係魔鬼。好似教仔咁，一個做忠，一個做奸，軟硬功都可以同時使用，你話幾正哩！菲菲日日響度寫公司既野，可能同事晚晚都響自己個 blog 度話菲菲變態都唔定，哈哈哈！

呢個配搭響管理上有時都會出現衝突，例如我想同事突破成績時，Annie 有時都會企響同事既立場同我撐，認為我唔理同事既感受，只顧住自己份工，毫無人情味。其實，我唔係只顧住自己份工 ga，如果生意唔好，大家都冇工做，冇理由大家一齊失業掛？有時 Annie 會明，但係大多數時候佢都係唔認同。不過算啦，呢個世界上只有一個菲菲，唔可以要求其他人同我既諗法一樣嘛，只要搵到平衡點，又有生意，又唔迫死 d 同事就得啦。

最可憐既係，鑊鑊呢 d 高難度動作都係落在我頭上，大家一要離開 comfort zone 就死都咬住唔放，唯有又突破下自己啦。響度返工，已經提升左我既 EQ 勒，因為要學識接受而家既班底同埋佢地既做事作風，咁就要諗多 d 「刁鑽」既方式去卒數勒。