心魔

今日 Pansy 叫左佢朋友黎做 facial，慣例係試左一次之後，要 sell 佢開返個 course，成為我地既會員。

當客人做緊面膜時，Pansy 走黎問我某 d 服務既問題，答左佢之後佢仲好疑惑咁。咁我就問下佢諗緊 d 咩啦。原來佢同客人傾過開 course 既事，不過客人只肯比好少錢，佢就想搵 d 價格低既服務比客人。我提議左另一項服務比佢，果一項服務需要一次過比大筆錢，不過每次既價錢都好抵，係公司入面最最最超值既服務。當時 Pansy 一聽到就心生抗拒，因為銀碼太大，佢唔想好似迫客人咁。我解釋比 Pansy 知，你又冇解釋過比客人聽，你又知佢一定唔會比錢？Pansy 認為我只顧迫客人，完全冇照顧客人唔想比咁多錢既感受，同埋要佢向 "不願比太多錢" 既客人提議比多 d 錢，令佢極之為難。本來諗住過料比佢做單大生意，仲好似害佢咁，於是我又忍唔住丙左佢幾野勒。

最後我同 Pansy 講︰「你而家一定好唔同意我既講法，以為我咩都唔知就亂 up 一通。不過我可以好肯定咁話比你知，而家唔係客人買唔買既問題，係你有心理障礙既問題。你一日都唔剷除呢隻心魔，你呢世都做唔成大單！記住我講左不止一次，對客人仁慈，即係對自己殘忍。你開唔到單冇人會可憐你，仲會比公司認為你無能。仲有，你介紹果一項服務，只係第一次比少 d 錢，之後佢要不斷比錢你，你都唔想成日都同佢 sell 野掛？何不一了百了，一次過開哂成年既單，等個客唔駛比咁多次錢？你 sell 多佢幾次佢一定怕左你，但係你今日只需 sell 佢一次就有排都唔駛煩，對你對佢都好，咁又有咩問題？我初出道時都比老細咁鬧過。你而家一定唔順氣，不過好快你會知我係為你好。」

做左咁耐 sales，邊有客人會話比你知佢有大把錢等住比你 ga？要客人比錢，係要搵到客人既需要之後一擊即中，只要佢有需要，一定開到單。

到客人試完服務時，我示範左點同客人傾單，只係用左 10 分鐘時間，佢就好開心咁照我既提議去比錢。

之後，我問 Pansy︰「你學到 d 咩？」

希望佢真係學到啦。