跑數生涯

已經冇做前線銷售好耐勒，不過跑數既壓力不比做 sales 時少。自己跑數時，有數係自己既功勞，冇數雖然都會比老細丙，不過都係自己受返個苦果，即係一切都係向自己交待 (只要唔比人炒就得勒 XD)。但係管銷售既，有數係同事既功勞，冇數就一定係我領導無方，你話幾精彩哩。

而家管 2 間店，話多唔多，不過都話少唔少。同事跑唔跑數，有時真係唔到你管。跑數既野，都幾自動波，有心有力就會跑，有心冇力就會跑慢 d，冇心既無論有冇力都係冇數的，呢個係做左咁耐銷售既經驗。女仔既優點係細心，不過缺點就係情緒化，呢樣野唔係一句性別岐視可以推搪過去的。事實歸事實，我係女仔都認為女同事係比較情緒化，你唔可以要求佢地日日都有 mood 跑數。

而家雖然係月頭，不過跑數既事都不敢掉以輕心，一個唔覺得就會變左龜兔賽跑入面既兔仔，驕兵必敗嘛。尤其而家老細既 target 越 set 越高，每個月既要求都不斷上升，唔係單靠積極可以解決既狀況，一定要諗下計先至有路行。今日我同店長就度左半日，諗下聽日既例會應該講 d 咩同埋鼓勵 d 同事做咩，萬一月尾條數唔靚仔，我地既責任都唔輕，真係大壓力過自己跑數。不過唔緊要，挑戰自己係我既嗜好，越有難度既野我越鍾意，做到先至顯得我有料到嘛~ 呵呵呵~